|
Separasion i aleshamiento de las mujeres
por Medi Cohen Malki Ayer, kuando yami a mi amiga por telefon, meti tino ke estava eskuchando a la musika de una kantante. Le demandi ken era esta kantante i me respondio ke era una kantante grega i ke oy, dia entero, estan eskuchando en su kaza a la musika de las mujeres… por ke en muestro payis, no puede ser ke aleshen a las mujeres de las shenas i de las kayes por motivos de relijion…. Si, ultimammente estamos sintiendo mas i mas sovre el aleshamiento i la separasion de las mujeres, prensipalmemte, en lugares publikos, por los ultraortodoksos. Este konsepto del aleshamiento de las mujeres (en Ebreo:Hadarat Nashim), se esta indo i espandiendo en muestro payis. Demandash de ke se trata?aki vos prezento unos kuantos enshemplos: ultimamente uvo en Zahal una seremonia en la kuala un grupo musikal de soldatos i de soldatas suvio a la shena para kantar. En el momento ke empesaron kantar, unos d’entre los soldatos relijizos abandonaron la sala sin la permision de sus komandante. Esta koza izo muncho bruido en Zahal i entre el publiko, koza ke esperto un gran debate si ay ke uvligar a estos soldatos ke eskuchen al kante de las mujeres.de todo modo, eyos fueron djuzgados i kastigados por anular el orden militar. Avlando de esto, en una seremonia de Hanuka, ke tambien tuvo lugar en una baza militar, las soldatas kombatantes fueron demandades de pasar i de asentarsen detras de los soldatos para no ofender los sentimientos de los relijizos. En otra baza militar las soldatas fueron demandadas en la seremonia, de kantar kon la boz basha para respektar a los relijiozos. La entorcha de esta protesta kontra las mujeres esta aparesiendo kon toda su fuersa en los kuartieres ultrareliziozos de unas sivdades de Israel. Aze unos kuantos mezes en Bet Shemesh una ijika de 8 anyos empeso a pasar via la kaye de los ultrarelizios aziendo su kamino a su mueva eskola. Un dia eskupieron sovre eya i de akel momento eya seso se irse a la eskola. Solo en estos dias eya torno a ambezarse. Esta ijika Naama Margulis, ke viene de una kaza relijioza, Zionista-nasionala, peko de azer sus 300 pasos a la eskola via la kaye de estos ekstremistas. Agora eya i su famiya devinieron en el simbolo de la lucha kontra este fenomeno de la diskriminasion i de la humiliasion de las mujeres… Aze unos kuantos dias una soldata fue ensultada por un ultraortodokso por ke no aksepto a su egzijensia de pasar i de asentarse atras en el otobus (los ombres se asentan delantre). Este ombre fue akuzado i pago una multa. Estas no fue las solas mujeres ke enkontraron la humiliasion i la humiliasion basho el nombre del ekstremizmo.i vos puedo dizirlo de una eksperiensa personal….. Las kayes de Bet Shemesh i de otras sivdades meskladas estan buyendo. Los sekulares i los relijiozos non-ekstremistas estan inisiando varias maneras de protesta. El shefe mayor del Zahal, el jeneral Benni Gantz, kondeno el aleshamiento de las mujeres. El priemer ministro, Binyamin Netanyahu, deklaro ke las mujeres se toparan en kada lugar i konvoko unas konsultasiones konsernante este echo. El Gran rabino de Zahal disho ke este komportamiento verso las mujeres es kontradiktorio a Halaha i ke en Zahal no pasara lo ke esta akontesiendo en Bet Shemesh. El ministro del eksterior deklaro el fenomeno komo una barbaridad, la ministra de edukasion de kultura i del sport kondeno estos aleshamientos de mujeres i los definio krimen i violensia, diziendo ke la polisia deve topar un remedio para esto. De la otra parte, el ministro Atias pretendio ke estas akuzasioens kontra los ultraortodoksos son una ensitasion. I yo me demando: ¿es ke agora se avrio un fronte de gerra de relijion en muestra Tiera Santa?
Fuente:
esefarad |
