El Chek Perdido

por Rivka Abiri

Kuando sono el telefon, el marido de Hedva tomandolo en la mano i en avlando disho unos kuantas vezes “Mazal Tov, Mazal Tov”, Hedva devista le vino a tino ke se trata de un haber bueno, de un akontesimyento alegre. Si, oy los dos eran tresalidos i orozos de oir del nasimiento de un treser bis inyeto. En el pasado ya tuvieron semejantas fiestas kon dos bis inyetas, ma esta vez la alegria era mas grande , mas bashka, mas savrosa, pormodo ka esta vez les nasio un ijo.

Hedva i Josef biven en Haifa i pensaron a tomar el treno al otro dia i vijitar el opital de Belinson, ke se topa en Tel Aviv ,100 kilometros lejos de Haifa. La sivdad de Tel Aviv, segun se save, es una metropolis i no se puede komparar en grandura kon Haifa, i tambien Belinson es un opital muy grande i famoso. Los tomo a los dos aidados un sierto tiempo para alkansar la sala de maternidad, para ver el bebe, para felisitar a los parientes i de enkontrar un grande nombre de membros de la familiya, amigos, i serkanos del ajeno ke vinieron a saludarlos.

Koby, el padre del resin nasido era feliz, saludando todos los musafires, kon gestikulaziones. Tambien se pudiya meldar de su kara, ke estava un pokitiko konfundido, emosionado en la manera ke eksprimava su alegria i mas o menos un poko desreposado. Kuando el nonio le dio el chek de regalo, Koby le rengrasio, lo abraso, lo beso muy ermoso unos kuantas vezes i despues negligemente lo metio en una de las aldikeras de su pantalon.

Los nonos disheron despues adios i entraron en el chicko restauranto al lado del opital para deskanser i tomar un kafe. Ensubito Koby, kon kara preta, entro en el restaurante, anunsyando ke en indo i veniendo a su kaza, le parese ke pedrio el chek.

Ke pepino.!!!! Viendo a Koby tan triste, todos pensaron ke la unika kosa ke se deve azer en tal kavso, es de telefonar a la banka i anular el chek. Ma aki empesaron las problemas. El abuelo antes de partir de Haifa, era un poko sikleado, estrechado i en adjile. eskrivio presto, presto el chek, lo arasgo del livreto de chekes, deshando el livreto en kaza. El no estava siguro de ke konto el tiro el chek, sera de su proprio konto o del konto ke tiene enjuntos kon su mujer. El tambien no se pudo arekodrar el numero de la sukursal de la banka, el numero del telefon, o el numero del chek. En sima de esto, no le vino al tino, ni pudia dar a su ijo el numero del kod de su banka, para las bushkadas en el Internet. La konfusion se izo mas grande, kuando la sukursal de la banka les disho ke vana yamar al dia siguente.

Decharemos a Kobi i sus ansiyas, pormodo ke vos kero avlar de Sam, ke en estas mesmas oras estava retornando del opital Belinson kuando vido un papeliko al lado de su karo. Este dia el vino de vijitar en Belinson su mujer, ke le aregalo kon el nasimiente de su primero ijo. Sam fue un muy joven padre i no eksperto, ke tuvo agora akomodar i preparar su kaza, para la yegada del bebe. Ensima de esto tuvo merikias finansarias, pormodo ke antes de unos kuantas dias el empeso un lavoro muevo, i agora la familya devia konfiarse mas o menos a su salaryo.
El papel ke topo era un chek para una alta kantidad de paras. El poveritiko se shasherio…. El nombre del la persona kelo signio, se topava estampado a la derecha, i era un residente de Haifa. Pero el nombre de la persona “para pagar” no fue eskrita klaro, la eskritura titerianda i mareada. Sam penso….No kero dinguna rekompensa, yo devo de retornar el chek. Empeso a yamar kon su telefono mobil el nombre de la persona en Haifa, ma no la topo. Dempues de munchos telefones, yamo la Banka en Tel Aviv, ke le disheron de asperar , ke eyos se vana okupar.

A la tadre, Sam retorno al ospital i konto a su mujer sovre el chek ke topo en la kaye. “Ke shakedji tengo por marido. Desha me ver”, le disho Hila, arasgando lo de su mano. “ Ke topada.!!! Todo ke tenemos de azer es de endorserlo i esto mos va desbolsar todos muestros gastes del Brith Mila, la mobilya del bebe etc”. Sam se revolto. “No tenemes derito, no vamos rovarmos las paras de esta persona, yo lo vo topar.” No se dezespero.

“Ken es el”? “No se” disho Sam, ”tengo de toparlo.” Entonses el telefon sono. La Banka de Haifa topo el proprietario del chek, el abuelo ke lo dio a su inyeto a la okasion del nasimento de su bis-inyeto. Este bebe afortunado tambien nasio en Belinson el mesmo dia ke Sam i Hila akalsaron de aserse padre i madre de un ijo.

El chek fue retornado. Koby , Hila i Sam se azieron amigos, selebraron la Brith Mila en la misma salla, i dieron de mismo a sus ijos el mesmo nombre Doron, ke signifika Regalo
 

Enviado por Rivka Abiri
Publicado en El Amanecer