Algunos pidrimos un padre o una madre de mancebos, deskonosiendo el kualo se asía en esos días. Ama kuando engrandesí, me ambezí del signifikado de kada una de ellas. Kero rekodrar al Jajam Salomon Pesaj nasido en Izmir, ke desde 1940 a 1963 (kuando deshó este mundo) asía los midrash en la kilá sefaradí de Kamargo, del kuartier de Villa Crespo, dunke asía tefilá.

Morava en la kaleja Gurruchaga en una kaza kon un grande portal de fierro y un pasiyo largo. La djente ke tenía menester de demandarle kuando era el midrash ajarvava su puerta. En una livretika de tapas negras él tenía apuntado las fechas de kada uno i uno, de los ke ya no estavan i tambien rekodraba a kada famiya en el dia de midrash de los suyos. Kuando en la kaleja le demandavan por alguien, kon pasensia sakava su livretika, le respondia i kedaba de akodro para la ora i el día del midrash. Unos días antes eran yamados los omvres para tener minian.

La mujer de la kasa aprontava la kandela ke se asiende por la neshamá antes de ampezar a meldar. El jajam Pesaj vestido kon traje i chapeo pretos, traía una validjika ande yevaba “takitas“ (kipot) i livrikos ke ponía enriva de la mesa para meldar el Bar Yojai i El Mistater. Apuntava en ke numeró de pajiná i kuando ampesavan a meldar, sintiamos su vos ronka: BAR IOJAI Nimshajta ashreja , shemen sasom mejabereja…, ansina seguiamos el kante. Kuando sintíamos EL MISTATER beschafrid jebyon…, es ke faltava poko para eskapar el midrash. La mujer de kasa kon el sharope o dulse de mimbriyo i el vasiko de agua adulzava enmientras se arogava al Dió ke no manke dinguno mas en la famiya .

Siempre demandí a mi madre de ke se aprontava ese día: likierda, guevo jaminado, alzetunas pretas, roskas i asta una kumida kaente, eya respondía ke ansina era la kostumvre, aresivía a mis tíos, tías i amigos ke avoltavan de lavorar, lo ke agora entiendo ke esto era la seudat del midrash.

El midrash se asía en kasa, ama en estos anios kasi todas las famiyas van a la keilá ande siempre ay otros omvres i ansina no manka para minian .

Ensendemos una kandela i kuando el jajam ampeza a meldar, la djente akompanyia; lo kurioso es ke las muyeres tenemos la melodía del midrash arientro i seguimos el meldado. Munchas son las famyias ke kontunuan esta tradisión djidía de muestros papús i babás ke la trusheron de la Turkía.