Unos kuantos diyas antes, muestra kerida Rachel amado Bortnick mos demando komo azemos la seremoniya de “kortadura de fahsadura”. A mi me plaze muncho mantener muestras ermozas tradisyones. Las tradisyones son la parte ermoza de una kultura i son spesyales.
En mantenyendo estas tradisyones, yo penso ke se mantyene i la union de una komunita. Mozotros los sefaradim tanbien tenemos muy ermozos uzos i tradisyones. Una de estas, es la seremoniya de “Kortadura de fashadura” Siguro ke kon el tiempo, trokó un poko, ma la baza no trokó.
La kortadura de fashadura se fiesta kuando una mujer esta prenyada de 5 o 7 mezes, despues ke se meneyo el bebe en la tripa… No kale fiestarlo ni en el sejen ni en el otchen mez… Kale ke seya un lunes o un jueves (diyas de Sefer)….ansina es el uzo.
Asta ke se korta la fashadura no es bueno de aparejar alguna koza para el bebe ke va naser. Ni una rida. La seremoniya se aze antes ke se aga eskuro. Por esto las invitadas vienen a las 1.30 de medyo diya. Dishe las invitadas, por ke esta fiesta se fiesta entre mujeres. Antes, la fiesta se aziya en kaza. En la kaza de las madres o en la kaza de la prenyada. La ke tiene la kaza mas grande.
Se invitava las tiyas, las nonas, las primas, las sovrinas i las amigas, siguro.
Agora lo mas se esta fiestando en un lokal. Seya en un lokal de muestra komunitá o en un kafe o en un salon de un klub. No se komo ampeso este uzo muestro, ma por siguro ke ampeso para ayudar a la famiya i despues se troko en una fiesta.
Komo kere ke ampese, ma agora se transformo en una alegriya. Alegriya ke va vinir un miembro muevo a la famiya i a muestra komunita i tanbien la alegriya inkomparable ke es : toparsen famiya i amigas, komer i bever i riyir, todas las keridas enjuntas.
Agora vos va kontar los aparejos i la seremoniya:
Se apareja un lugar en el salon, ande se mete un sestiko dekorado. Aryentro de este sestiko se mete unos kuantos (4-5) metros de una ropa blanka i fina, una tijera ke korta bueno i bonbones blankos. (Agora me vino al tino ke antes, yamavamos estos bonbones blankos “alkonfites”)
Ya esta la ora 1.30 …ya ampesaron a vinir las musafiras kon sus regalos. A la entrada se ofre likor kon shokola. Despues ke ya vinieron todas, se ampesa la seremoniya, a lo mas tadre se ampesa a las 2.30.
¿Ken va kortar la fashadura? Esta kestion es muy emportante. La ke va kortar la fashadura deve de tener padre i madre.Esto es para ke se engrandeska el bebe kon padre i madre. De preferensya se eskoje ijikas mansevikas, o la ermanika mas grande de el bebe ke va naser.
Se toma la ropa de el sestiko, se avre i se espande ensima la meza. Despues todos toman unos kuantos alkonfites i los etchan ensima la ropa. Esto es para ke el bebe tenga una vida dulse. La madre i la esfuegra de la prenyada etchan liras de oro ensima la ropa (puede ser medya lira o un kuarto). Esto es para ke el bebe tenga una vida rika. La ijika ke va kortar la fashadura, toma la ropa, da un korte kon la tijera, a un boy de serka de un metro o un poko mas, sin mezurar i despues la trava la ropa de las dos partes i la arazga asta la otra punta.

De este pedaso se kuze una kamizika larga. I esto es para ke el bebe tenga una vida larga. Esta kamizika se kuze pishin i se mete a la
tchanta ke se va yevar al espital.
De ke salyo el bebe de la tripa de la madre, se viste esta kamizika al bebe, dainda sin ke lo laven. En lo ke ay una kortadura de fashadura en la famiya, este dover de kuzir la kamizika, mos dan a mi o a mi ermanika, por ke savemos kuzir. A esta kamizika se mete kordelikas, rozikas, dantelas. Agora ke ay ultrasones i se puede saver el sekso de el bebe, se mete a la kamizika ornamentos a propozitos. Si es ijika, se mete fyongitos roz i rozikas. Si es ijiko se mete kordelas blus i se broda un Magen David blu.
Antes no savyendo loke va parir, se brodavan las kamizikas un poko kon blu i un poko kon roz.
Despues se ofre alkonfites a todas las invitadas. Aryentro de los alkonfites blankos, se meskla unos kuantos alkonfites blus -si es ijiko, o roz -si es ijika ….
I se ampesa a los tratamientos. No se kere ditcho lo bueno ke ay en akel bufe. Uno mas savrozo de otro. Modos i modos de kozas saladas i dulses. Beviendas i tchay i kafe…..
Serka de la eskapadura de la vijita vienen el marido, el esfuegro i el padre de la prenyada a komer un dulse.
A las invitadas ke ya ampesan a yirsen, se da una bonbonyerika kon alkonfites aryentro, komo un rekuerdo de este ermozo diya ke pasaron todas enjuntos.
Esta seremoniya de kortadura de fashadura es UNA de muestras ermozas tradisyones sefaradis. Siguro ke es tanbien, komo ya dishe un poko mas ariva, una okazyon para ke se topen los miembros de la famiya . Para ke se konoskan kon los miembros muevos ke se ajustaron a la famiya, komo ermueras muevas, kosuegras muevas etc. Por ke malorosamente kon la rutina de la vida moderna, son ralos los momentos ke puedemos adjuntarmos kon la famiya.
Keridos Amigos,
Ke tengamos siempre okazyones de alegriyas……..

Fuente: Ladinokomunita/esefarad