La kuchara del mazal

por Rivka Abiri

Me plaziya vijitar la Tia Djoya, porke eya savia aparejar unos dulses muy ekskluzivos i savrosos. Uno de sus dulses los mas reushidos era el loap de binbriyos. El loap se aze buyendo los binbriyos kon muncha asúkar, i dospués se desha eskurrir el kaldo por una bolsa de hase. Kon este kaldo kolorado, dospués de buyirlo de muevo, i kon los pektines ke kontiene, se aze el loap. Se inchen kalupes chikos kon este dulse de kolor de un rubi, i se desha ke el loap tome la forma del kalup. Se abolta el kalup sovre un chiniko de plata, i se da al musafir kon una kupa de agua. En vezes la tiya mos dava tambien dulse blanko en un chanak, kon agua yelada.

La Tia Djoya ke bivia sola en una kaza grande, mos resivía kon loap, i su
sovrina Esterika mos dava una kuchara espesyal para komer este dulse. Esterika
era kazada, ma no tenia kriaturas, i kada vez que azíamos una vijita
mos aresivia kon amisturya, bezos, abrasos, i dulse. Ande la Tia Djoya avía una guerta kon munchas flores i un arvole de igos. Todo esto era un pasatiempo agradable. Es ansina ke una vez en djuando kon mi ermaniko, desidimos de eskonder la kuchara en el saksi de igos.

Kuando la Tia Djoya se murió, muestras vijitas se kortaron por modo ke la erensya kompleta paso en las manos de Esterika. Dospués de este tyempo, no la vimos mas a Esterika, ma la djente kontava ke ella, komo balabaya buena, mirava bueno la kaza i las flores, i kontinuava a azer dulses. Un dia Esterika vido ke el arvole de igos se avia engrandesido, tomo un saksi muevo, kito los kyokes, i ensupito deskuvriyo la kuchara de plata. Se alegro, i tomo la kuchara komo un siman de mazal, i mizmo pensó ke kon esta kuchara se le iva avrir el mazal suyo. I de vedra, un anyo dospués de la muerte de la Tia Djoya, Esterika paryo un ijo.

La Granmama le krosheto una jaketika i un chapeo de lana bleu, mos tomo a mozotros, i mos huimos todos a ver al bebe i a felisitarla. En una kamareta, sovre una kamika chika vimos un bebe dulse que se yamava Nisim. En mirando la kamika de Nisim vide un ajiko i una kucharika de plata enkolgada sovre el
baldakino, la mizma kuchara ke mos arrovimos, i ke eskondimos en el
saksi de igos. No avia shuphe…. Ma ten boka enprestada i dizele ke era muestra kuchara ke topo en el fondo del saksi, ande la eskondimos! Ma no vos olvidej ke Esterika kreyo todo el tyempo ke la kuchara le avia traido mazal.