Relato:

Nisimachi

por Rivka Abiry

Konosko a Nisimachi de muncho tyempo. Una persona arrepozada, agora aedada, ke syempre en viendome me saluda kon una chika riza . Hue amado en la mahala de toda la djente, indemas de todo de las kreaturas. El djugava kon eyos porke lo amavan.

Ma ayer Nisimachi me se vido de otra manera. Estava soliko asentado en el banko, kayadiko, kansado i triste. Tuvo una kara preta i me paresyo hazino.

“Dizeme, tienes problemas, tienes dertes? Kontame……deke estas dezesperado ?. Kualo afito ?

Me miro i se kedo mudo. Yo le deshi tyempo.

“No puedo mas entender el mundo” me disho de una boz triste, i en tomandome de la mano entrimos en su kaza. Ke veyen mis ojos en esta kaza chika….. una meza arresentada para muchos mosafires, una maravia , komo resivir una novia. Sovre la meza filikas kon kezo, tortas, bevienda, biskochos, dulsurias, desayunos savrozos, frutas, un samovar.
.
“Me di muncha pena. Merki, lasdri, arresenti, enkomandi todo esto, por modo ke keyria ke este diya fuera para todos un diya non olvidado. No me hue kolay, keriya ke ayga buluk., Solo a ti te lo esto kontanto “.

Dainda triste, kontinuo. “Ma la soledad me esta matando. Keriya ver mis kreaturas i kombidarlos oy a fiestar kon mi el 75 aniversario mio.. Uno de mis ijos me disho ke tuvo las kreaturas hazinas, el otro, ke este mizmo dyia tiene kartas para el teatro, i el treser, ke keria fiestar otro diya.” Ijos chikos kantarikos de miel, ijos grandes kantarikos”….. i se kedo en medio de la fraza.

Kerya konsolarlo. No le pude alivianar sus dolores. En este momento se chafteyo a la puerta. El salto kon alegria, ma hueron solo las kreaturas de la mahala.

“ Tio , te rogo aremendame este football desmazalado”!!!. Nisimachi tomo el football, una tijera, una alguja i un filo i empeso a kuzir. Entremientes vinyeron otras kreaturas, la kamareta se incho, i los chikos se echaron a komer i bever. El bruido grande,bozes de alegria, la komida presto se eskapo, i la meza se vazyo.

Despues empesaron a djugar, a eskondensen debasho de la kama i la meza. Muncho gurulti, grande pasatiempo.

“Tio, mostra a Stoiko, la medalia ke aresivites del Rey”!!! Nisimachi avrio el dulap i mostro la medalia. Dainda mostrando la, vinyiron otras kreaturas, entre eyos djudios i bulgaros, ke se metieron al derredor suyo i le demandaron de kontarles deke resivio esta medalia.

Nisimachi , olvidando su tristesa, kon alegriya, empeso su kuento del tiempo kuando la Danuba, en un invierno duro, inondo los kazales situados al lado de Vidin. El tomo una barka i sin espanto del rio ondozo, ni de los torrentes ke inodaron las kayes i las kazas de munchos kazales, se echo a salvar muncha djente, i antes de todo las kreaturas. Vendo las kazas derrokadas, se apiadava de esta djente, sin mirar si son Judios o Bulgaros, ke se pudiyan aogar en el lodo.A las kreaturas , les kitava los vestimientos mojados,les dava otros sekos i si eran ambiertos, les dava a komer, si tenian sed, les dava bevienda, o otras kozas ke tenian menester. Tambien los embiyava para unos kuantos diyas en otras kazas para kayntarsen, fina ke la tempesta termino i pudieron retornar a sus kazales. Por esta ovra voluntaria, i la mitzva ke izo, resivio komo eroiko una medalia del Rey Boris III de la Bulgaria.

Kuando empeso a kontar Nisimacho, subito el bruido se kalmo, i una grande kayades reyno en la kamareta. Las kreaturas tresalidso de su kuento, lo eskuchavan, mirandole la boka. A Nisimachi le paso la tristesa, se le achilearon los ojos, una chapeta i una riza suvieron a su kara i la trokaron. El hue felis i oroso.

En partiendo las kreaturas ke le dieron tanda alegria, el me dicho:

“ Oy hue por mi el mas ermozo aniversaryo, el mas ermozo diya. Oy hue una fiesta grande para mi.”

En saliendo, yo lo miri una otra vez de la ventana i vide la felisidad en su kara i el alimpindoso las lagrimas de sus ojos.

Al kavo de todo, kualo keria el aedado Nisimachi por su aniversario? Regalos, flores, un kuti de chokolatas???? Yok. Nada de esto, solo un poko de amor, una palavra dulse, simpatiya i rekonosimyento.
 

Fuente: publikado en "El Amaneser"