Esta copla lirica de contenido critico fue escrita en ....1920,por Alexandro Perez de Esmirna (Turquia),por supuesto en Ladino o español antiguo y lleva como titulo "Los nuevos ricos",81 años despues es como si la hubiera  escrito hoy.  Fue publicada en el Buketo de Cantes ,donde lleva como titulo "Las nuevas Complas del Felek"

Oy no kedo mas purim

ni abrir las manos

No ayudan guebirim(ricos )

sus propios hermanos.

Para vicios vanos

sus ijos gastan

a punyados y non dan

de vente hazino

ni a sus sobrinos

Bavono muy pocos son

los bienhazedotres

Ma ombres sin corazon

falsos niegadores

Chinchas de kolores

oy ay sin heshbon (cuentas)

Kuando sienten

"suscripcion para una obra"

dizen  no mos sobra

Grandes merkaderes ay

yenos de miyiones

ke no ayudan kolay

las instituciones

onde sus aksiones

cale apoyar

para pueder sulashar

mizerias escuras,

males hazinuras.

Dizen ke non ay ganar,

ke kosta la vida,

por mishor amontonar

lira mofecida:

creyen ke la ida

nunka van a hazer,

Kuando dan es sin plazers

siempre enrollando y kafureando.

El eznaf es hovarda

malgrado la criza

kuando le demandan da

siempre kon sonriza;

tiene por divisa

nunka refuzar

el da sin hacer bazar

da sin hablar nada,

sin hacer girada.

Muchos rikos sin hazer

giradas sin kuenta

non dan kon muncho plazer

las sien o cinkuenta

Keren ke se sienta

sus buena aksion,

keren publikasion

en dos ,tres jornales

¡ke gustos banales!

El tavan ke vos guardre

de los parvenidos,

refuzan a su padre

i a sus keridos:

tapan sus ayidos

sus oshos tambien

Kuando sienten "Hazer bien"

dizen no tenemos

no mos mantenemos.

Es verdad ke rikos son,

ma son sin nobleza:

a prima okazion

mostran sus flaqueza

Todas sus rikeza

non vale prendar,

siempre marmullan al dar,

olvidan ke antes

staban sin mundantes.