|
Purim
ante anyos
por Rivka
Abiry
En invierno
i en la primavera bivimos en una sivdad en la Bulgaria
ke tiene el más grande porto. Tenía una komunidad judía
chika , ma buena organizada, kon su presidente, su Beit
Haam, su eskuela judía primaria i los klubes de jovenes
de Maccabi, Hashomer Hatzair i Beitar. También avia un
kal i los varios autoritades de ayuda por los chikos ke
nesesitavan komidas kayentes (la Trapesaria) i otra
djente ke tuvieron primura de vestidos.(Malbish Harumim)
No lejos del Beith Haam era el hotel Musalla, ke era
konsiderado komo uno delos mejor en muestra sivdad.
Entre los musafires eran personas de la kapitala i de
los otros lugares en la Bulgaria. El otel era un
edifisio de tres etajes. En el premier piso avía un
kafene, más o menos un lugar de reunión i jugos para los
ombres de esta sivdad i sus musafires. El kafedji era
Mois Arditi, ke era konosido para sus kuentos, istorias
i shakas Ansi le dieron el nombre Mois El Shakatchi. No
estava kortando liras ma sus shakas , apresyados, ma de
vezes un poko saladikos i también sarkstikos azian riyir
la djente. Moise fue una persona kon mutcho hen, savia
unos kuantos linguas, fue heneso i tenia muncha azlaha.
I es ansi ke lo invitavan a los reuniones de la
komunidad judía, i a las festas del Beith Haam, porke él
savia komo englenjar kon horas a su audiensa.
Mis padres usavan avlar mucho sobre él, pero yo nunka
non lo enkontri, fina el diya ke mi tío i mi tía fueron
anonunsados de tomar una kamareta i estarse en el Hotel
Musalla.. El tío Benjamin era mi tío kerido i ansí su
esposa Dora. Amava espesialmente tiya Dora porke eya
usava yevar siempre muchas djoyas, kordelas de oro,
orejales , aniyos en sus dedos i en su manas, inklusivo
chikos peynes en su kaveyos. Yo adorava mirarlos,
tokarlos, o tomandolos en mis manos.
Rekordo ke
el dia ke devian arivar koinsidió kon Purim i ke mi
granmama justo eskapo kusir muestras máskaras de Purim.
Mi hermano era el djugador de kartas i yo la " Roska" ,
el biskuchiku tradisional de Purim.
Sentándos en la entrada del otel asperando a mi tío,
vimos subitamente a una persona joven jevando en sus
manos una kuti, korriento komo un loko, en fuyendose de
la puerta , saliendo afuera del otel, komo mordido de
una bezba. Derecho después de él vino mi tía también
koriendo gritanto:
“El es un
ladrón, apanjalo por favor. Él me arovo mi entera djoya,
ayudame por favor, alkanso lo”!!! Eya gritava, yorava i
gritava. La djente en el otel tomaron kompasión de eya,
i empesaron devista a korer después del ladrón. I
mosotroes también mos mesklimos kon el partido. Komo ke
serka del otel ay kaleshonikos muy torsidos, desendiendo
al porto, el ladrón le fue kolai de eskonderse i
mosotros vimos la desgracia de perderlo
Volviendo al hotel , kon los mokos enkongandos,
enkontrimos ayi toda la djente kon una riza en la kara,
ke se estavan patladeantose de ryir. ¿Ke afito?? Ansi
entendímos ke mi tío ke fue amargado de una de las
shakas del Shakatchi, keria vengarse. Asieron un bas kon
su esposa ke él podría kontar la mejora mentira i de tal
modo enseñar al Shakatchi una lesion. El joven, el
ladrón, el kuti de djoya i todo el resto eran falsos,
simplemente un maimunchuluk, un mansevedumre, un teatro
de Purim. Era una mentira grande, pero la djente
disfrutaron de eya i en presto todo esto se konvertió en
el haber el mas reushido de Purim en la sivdad. El
poveretiko Shakatchi se meto en un kenar, kon una kara
preta.
Kuando se avla de Purim siempre me akodro de este
akontesimyento
i mesmo en eskrivierndolo me toma la riza. Purim alegre
|