|
Ovadia ben Yaakov Sforno: el ombre de Cesena
(en haketia)
por Adi V. Cangado
El Rav Ovadia ben Yaakov Sforno, tambien konosido kon respekto en su
epoka komo “el Sforno”, nasió en la sivdad la italiana de Cesena, en
el anyo de 1470 (ke es el mizmo ke el 5230 de muestra tradision), ma
alguno dize ke en el anyo de 1475 (5235). Myentres ke era chiko, el
Sforno estudió muncha Tora, y kuando mayor viajó a Roma por mor de
ir a darsar a la universitá. Ayá aprendió sovre filozofiya,
medikeriya y tambien números. En el anyo de 1501 resive su lisensia
de medikeriya.
El Sforno bivió en la sivdad la esta durante trenta anyos fazendo de
marbits Tora. Él biviya akomodado y teniya amistades kon djentiles.
Ansí el eskritor el alman Johann Reuchlin meldaba ivrit djunto él.
Maz tadre, Reuchlin defendió a los djudios y a el Talmud kuando
arrivaron los problemas para mos. Tambien fue amigo de el rey el
fransez Henri II.
Abandona Roma y se va primero a la sivdad de Reggio y despues a la
sivdad de Bologna, onde estava repozado su ermano Hananel, ken ayuda
a el Sforno y le desha paras, lo kualo faze posivle ke el Sforno
akave su komentario de la Tora. En la epoka la esta, aparese komo
abir harofim, dedikado a la medikeriya.
El Sforno krea un Beth Medrash en Bologna, onde ensenyó Tora fin su
muerte en el anyo de 1550. Bivió la ekspulsion de los djudios los
sefaradim en el anyo de 1492, y vio a los djudios de Sizilia y de
Sardinya fuyir de ayá por mor ke eran tierras de el rey de Aragon.
Tambien bivió la ekspulsion de los djudios de Nápoles, ke estava
basho los reyes los espanyoles. En el anyo de 1513, vio la fragua de
el ghetto de Venesia. En el anyo de 1553, akontesió la kema de el
Talmud, ma Sforno ya non estava.
La pensada de el Sforno le da muncha emportansa a las palavras de la
Tora, por esto él uza el peshat, ma tambien abondan influensias de
la sensia, la filozofiya y la moral. El Rav non se keda en la
investigasion la filolójika de los byervos, ma bushka el senso de el
pasuk. Su hashkafá es afalagar a el puevlo djudio y ensenyar sovre
la idea de el ombre el universal (non ulvidar ke el Sforno es un
ombre de el Renasimiento). Ansí, su pensada es de muncha emportansa
para la eskola la litvana de el Musar (ke era una eskola de pensada
en los syékolos dyezimueve y vente). La pensada de el Sforno abolta
alderredor de las ideas las siguientes:
*
* la emportansa de el ombre,
* sus preokupasiones,
* sus esforsos y sus sentimientos,
* y la teshuvá.
El Sforno kreye ke el ombre deve alegrar a el Santo, Bendicho Su
nombre, por mor de el pasuk ke dize, yismah Adonai bema'asav,
“alegrar-se-ha Dio kon Sus ovras”. Ma algunas vezes el ombre yerra y
deve fazer teshuvá. El Santo, Bendicho Su nombre, dio a el ombre
behirá hofshit, “libertad para elijir”. Ma por demaziya, Israel deve
ser afilu maz djusto, por mor de el pasuk ke dize, kedoshim tihiu
“[vozotros] santos seresh”, y por mor de esto dio el Santo, Bendicho
Su nombre, la Tora a Israel; y sovre esto disho el Ramban, ma'asé
avot siman labanim “las ovras de [muestros] padres son un simán (una
sinyal) a los ijos”.
*
En la ovra de el Sforno es emportante la influensia de las sensias
de la natura y de la medikeriya, y afilu de la farmasiya. Él era un
ombre adelantado, por mor ke pensava ke la Tora deviya ser meldada y
adjustada asigun los menesteres de la epoka. Andjak era un ombre
observante de mitsvot syempre.
Fuente: laparasha.com
|