En Enero 1988 publiko el Profesor Walter Weiker, professor de siensia politika i sosyologo de la Rutgers University en los E.U.i spesialisto de la historia moderna de Turkiya, un livro sovre los Djudios de Turkiya en Israel: “THE UNSEEN ISRAELIS : The Jews from Turkey in Israel”. Solo de este titolo se puede entender kuala fue su konkluzion, despues ke izo esta investigasion muncho tiempo: Los ke imigraron de Turkiya a Israel forman una komunidad kayada ke no se aze muncho remarkar en la vida publika en Israel. Lo ke no kere dizir ke no tuvyeron kontribusion al establisimiento de Israel i su dezvelopamiento . i en desparte, no ay ningun Turkano – Israeli ke no se identifiya enteramente kon el Estado de Israel.

Kero aklarar, ke lo ke va dizir aki es bazado en parte sovre las enformasiones de este livro, i en grande parte sovre las statistikas i konosensias personales de munchos anyos de mi vida en Turkiya, i en Israel, en el kuadro de mi aktividad en la Asosiasion de los Turkanos en Israel.

El estudio de Walter Weiker konserna los Turkanos ke izyeron sus aliya entre 1948 i 1987, eksplora komo i a ke grado se adaptaron a la vida en Israel sosyalmente i ekonomikamente, i –muy interesante- komo eyos mantuvieron muncho de sus identidad Turka, al lado de sus Djudaismo sefaradi, todo en azyendosen en mezmo tiempo Israelianos buenos i respektavles. Este studio mos amostra ke una de las karakteristikas de los Israelis Turkanos es ke eyos no tienen un imajen bien klaro, un profil jeneral bien konosido en Israel komo tienen los otros grupos de imigrantes segun los payises de orijen delos kualos arivaron : komo los Marokanos, Irakianos, Parsis, Polonezos, Almanes, Gruzinis, Rusos etc. [I ke unos de los faktores ke eksplika esto es sus historia de 500 anyos de vida en la Turkiya.]

La razon de ser un grupo ke no es muy remarkado no es solo una kestion de kuantidad. Verdad ke los Turkanos somos mas pokos de otros grupos, ma de 80 a 100 mil personas no azen un grupo insinyifiante. Fuimos i somos, mezmo ke paso tantos anyos de la aliya grande, un grupo jeneralmente kayado, i ke prefera solusionar problemas sin azer bruido. A mi opinion esto es por la razon sigyente: desde nuestra ekspulsion de Espanya mas ke 500 anyos antes, i despues ke eramos en Espanya un grupo etniko relijiozo muy mesklado en la vida del payis, el Djudio ke arivo a bivir en el Imperio Ottomano arivo a la konklusion ke estar kayados, no demander muncho del governo, no mesklarse en politika era el mijor kamino de guadrar la identidad, de estar trankilos. Esto kontinua en Turkiya i en partida en Israel asta oy.

I despues de la aliya a Israel, mesmo el mas sionisto de entre eyos, mesmo el mas edukado de los Turkanos, kontinuo kon esta tradisyon de akseptar la autoridad del sistema ke govierna sin kitar una boz de kesha, o en biervo mas popular de “kayades”, i ansi meresyo el titolo de Weiker “The Unseen” (los invisibles). El Turkano se kontento de ser buen Djudio, buen komersante, buen doctor, buen akademiko, buen vizino, buen agrikultor, buen soldado buen kibutznik o moshavnik, buen diplomato, buen avokato o buen djuzgo. Mesmo si sintiya ke estava diskriminado al lado de otro grupo etniko no supo kesharse.

I has ve halila no mesklarse en politika! Kon muy pokas eksepsiones: uvo solo 1 miembro de knesset nasido en Turkiya, Moshe Sardinas, elijido no por sus merito si no ke por lista del partido (Avoda). No uvo ni un jurnalisto famozo ke va tener kualo dizir en la prensa de Israel( a la eksepsion de Yoel Markus ke no es ekzaktamente el sefaradi de Turkiya ). De ke? Por ke estas karakteristikas – ke ironikamente se dizen ( no mos karishtreamos en los echos del hukumet) – las tenemos en nuestros genes. Ay el deputado de Shas Yishak Saban, la deputada de Kadima Ruhama Avraham i Dr. Rahel Adato ke son de famiya de Turkanos, nasidos en Israel i ke konosen el Ladino. Tuvimos a Avraam Altalef komo primer Mayor de la sivdad de Yehud, i al Mayor de Kiriat Tivon Shmuel Abuaf (oy director jeneral delMinisterio del Transporto), ma jeneralmente se puede dizir ke mezmo la segunda jenerasyon de los olim de Turkiya no les interesa la politika.

El historiador i investigador Djudio de Turkiya Rifat N. Bali publiko en 2003, entre munchos otros, un livro perfektamente dokumentado i intitulado : “La Aliya : ke es el narrative de una emigrasion kollektiva”, onde el eksplika las razones ke kavzaron esta emigrasion muy importante de los Djudios de Turkiya, ke es un pays ande no uvo holokosto, ni donde los Djudios fueron arondjados: mas ke la mitad de los Djudios de Turkiya vinyeron a bivir en Israel. Entre los anyos 1946-1951 emigraron de Turkiya a Israel kuaje 43000 personas. Asta oy se puede dizir ke arivaron direktamente de Turkiya mas de 80000 personas, kuaje 80 % de lo ke kontavan los Djudios de Turkiya antes la fondasion del Estado de Israel.

Si la Turkiya nunka arondjo ofisialmente a los Djudios, si en Turkiya no uvo holokosto segun uvo en Europa, si la Turkiya no es un payis arabo , (a la kontra, fue el primo payis musulmano ke rekonosyo a Israel en 1949), porke vinyeron tantos Djudios? Porke desharon kazas i echo en saviendo ke ay ke bivir un sierto tiempo debasho las tiendas i las barakas inkonfortables de los “Batei Olim”, i solo un persientaje muy chiko de los imigrantes bolto a la Turkiya?. Para dar repuesta ke tambien eksplika las razones del komporatmiento karakteristiko del imigrante Turkano en Israel, aparte de lo ke dize Weiker, i bazandomos sovre lo ke dize Rifat Bali, i mis observasiones komo un ijiko de Izmir en edad de Bar Mitzva en los anios de emigrasyon massiva, ay ke avlar en kurto de las razones de esta emigrasyon.

Me akodro muy bien la atmosfera de los anyos 48-50 en Izmir, kuando munchos de mis amigos partiyan para Israel, de akeyos ke esperavan sus turno para suvir a un vapor de los mas primitivos ke los yevaria al porto de Haifa. En akel tiempo, edad de Bar Mitzva, yo asisti a los kursos de los djovenes sionistas, i puedo dizir ke munchos fueron los djovenes ke fueron impresionados por el sionizmo i izyeron aliya. Los parientes no se opozaron a sus ijos de edad 13-18 anyos ke vengan a Israel en saviendo muy bien ke sus ijos se ivan direktamente a los kibbutzim i a la armada, una vida diferente i perikoloza, porke no kreiyan ke el avenir de sus ijos en Turkiya podria ser mijor. Estos ijikos i ijikas fueron por grande parte los ke se izyeron miembros de kibutz o de moshav, ke gerrearon las gerras de Israel, todo en adaptandosen enteramente a sus nuevas kollektividades.

Mas despues los parientes de estos djovenes emigraron eyos mezmos, seguro por adjuntarsen a los ijos, ma tanbien porke no tenian muncho de pedrer en la Turkiya. Verdad ke en Turkiya no uvo holokosto, ma no faltaron despues de la fundasion de la republika Turka, i durante la segunda gerra mundial movimientos nasionalistas-antisemitas Turkos influensados por el Nasyonal Sosyalizmo Aleman, komo renderles la vida impossible a los Djudios de la Trakya, ovligar a tomar alkunyas en Turko, de avlar la lingua Turka al lugar del Judeo-Espanyol (Ladino), publikar karikaturas de Djudios, burlarsen de sus aksento, i empozar el famozo dasio “Varlik” sovre las rikezas (!)mezmo si no eksistian, o kon evaluasiones fiktivas exajeradas, mezmo a los muy modestos, kastigarlos a los ke no podian pagar en tomandoles asta las kamas de kaza, embiyandolos a lavoros forsados kon preteksto de servisio militar, kurto: un esforso del estado para anular la influensia de las minoridades, ma sovretodo de los Djudios, en la vida ekonomika del payis. Esto arivo en los anyos 1942-43.

Mas despues uvo ken pudo rekonstituir su echo en Turkiya, ma una grande majoridad se vido en kondisyones sosyo ekonomikas muy malas, sin ninguna esperansa de dar parnasa, edukasyon o un buen futuro a los ijos. Para esta djente Israel era una esperansa, i eyos fueron los primos a emigrar.

I Israel, malgrado todas las difikultades, provo a los Djudios ke las esperansas eran djustas : No vamos a dizir ke los proves se izyeron rikos, ma tuvieron empleos seguros i kazas, i edukaron a sus ijos. Vimos ke el ijo del vendedor ambulante se izo ofisier de alto grado en la armada, empleado en bankas i kompanias, konstruktores, komersantes chikos o grandes, diplomatos, funksionarios. Vos dare el ekzemplo del ambulante ke vendiya ilos i botones, Leon Kapuya el (serchi) de Izmir, su ijo es oy el kapo de la komisyon de ovreros del Bezeq. Koza ke nunko podria akonteser en Turkiya.

Los imigrantes de los primos anyos del estado se instalaron kuaje en toda parte de Israel, del norte al sud,en kibbutzim, moshavim, en Haifa,en Yerushalayim, Ashkelon, Beer Sheva, en el sentro en Lud, Ramle, Yehud, Or Yehuda o Yafo. Ayi formaron sus sinagogas, kon sus forma de orasionar ke no paresiya mezmo a los otros sefaradis, i tambien i se enkontraron. Los ke arivaron mas despues se konsentraron mas muncho en Bat-Yam, Holon,Rishon i despues de los anyos 70 en Ramat Aviv i Herzliya.

Uvo, entre siertos djovenes ke se toparon en el kibutz o en la armada algunos ke pensaron ke sus identidad de ser de Turkiya seria dezaventaje para sus integrasion o avansamiento, i ke guadraron sus identidad de Turkano . Ma en poko tiempo se vido i se provo ke el Djudio de Turkiya no tiene nada de menos de los otros . Oy una artista komediana muy famoza komo Adi Eskenazi, al artisto de sinema Aki Avni, muzisyenes o kantadores famozos komo Shlomi Shabat, Bary Sacharof, Miki Gabrielov, el famozo chef Hayim Kohen no guadran ke son Turkanos. La muy grande majoridad nunka guadro o perdio su identidad de Djudio sefaradi de Turkiya.

Desde el anyo 1950 los jovenes renovaron la asosiasion de olim de Turkiya ke ekzistyo empesando de los anyos 30, i formaron una organizasyon ke la yamaron Itahdut Yotsei Turkiya. Ke es la Itahdut ke ekiste ayinda oy, i ke sin avlar de esta organizasyon no se puede avlar del profil de los Turkanos en Israel.

Verdad ke los ke tenian en los anyos 50 una situasion ekonomika fuerte o buena no izyeron aliya i kedaron en Turkiya, ma la aliya kontinuo siempre, kuando por razones familialas, kuando por razones ekonomikas, ma el sionizmo i el orgolio de ser Djudio se renforso en Turkia, komo en otros paises, despues de la gerra de 6 dias, i desde 1967 asta el anyo 2001 imigraron kuaje 17000 almas. En los kavos anyos de los kuaje 20000 Djudios ke kedaron en Turkiya, kada anyo arivaron a Israel mas o menos 100 personas ,segun los rejistros de la Itahdut Yotsei Turkiya. En 2007 i 2008 los ke vinyeron son 104 + 104 imigrantes donde 50 kriaturas; en 2009 kuaje 200, donde 23 solteros, 35 famiyas kon 27 kriaturas (kuaje 100), i otras personas solas komo bivdas, o divorsadas. Esto sin kontar los ke no vinyeron komo imigrantes ofisiales. Ay diezenas ke vinyeron komo turistos i ke desidieron de imigrar en estando aki, i no figuran en las statistikas.

La imigrasion de los anyos kavos se eksplika kon la agravasion de las kondisiones ekonomikas i el antisemitizmo en Turkia. No se puede dizir ke ay motivasion sionista, o el dezeyo de evitar la asimilasyon, o el espanto de ver ke sus ijos se van a kazar kon non Djudios. Mesmo si el dezeyo de bivir en Israel ekziste en los korasones, tanto ke el djudio de Turkiya no se siente direktamente menasado i en konsiderando ke Israel no es lugar fasil, no siempre se enkoraja a azer un paso tan importante komo la emigrasion.

La aliya de los anyos 70-80 trusho a Israel – kon motivo de los menazos de grupos ovreros i studentes de la siedra politika- una nueva klasa de imigrantes: djente ekonomikamente mas fuerte, mas edukados, konosiendo la Turkiya i la lingua Turka a la perfeksion, i kon la eksperiensa i el menester de bivir en grupo komunal i cultural. Weiker los yamo (Grupo Ramat Aviv) . Estos no tadraron de formar en Herzliya un klub de enkuentro social, i mas tadre krearon Lodjas Bnei Brit i de masoneria. i desde los anyos 80 la Itahdut esta dirijida por djente ke apartiene a esta imigrasion. Sus lingua de komunikasion fue mas en Turko ke en Ebreo, i a mi avizo, si la Itahdut tiene difikultad de komunikar i atirar a los Turkanos de la periferiya, de los kibbutzim-moshavim i la aliya de los anyos 50 en jeneral, la dominensia de la lingua Turka es probablemente una de las razones. Por seguro ke no es la sola.

La primera jenerasion de los ke emigraron de Turkiya a Israel son segun eran en Turkiya, tienen las karakteristikas identikas komo el Djudio de Izmir o de Istanbul. Les plaze enkontrarsen, los Ankaralis, los Izmirlis, los Edirnelis, los Kuzgundjuklus, en varias okazyones. Una ekspozisyon de fotos de la komunidad de Edirne ke no ekziste mas tuvo lugar fin 2009 en el lokal de la Itahdut. Los Izmirlis uzavan a enkontrarsen en el Park Hayarkon, i kavamente se enkontaron en el lokal de la Itahdut.

El Turkano no es muy relijiozo, ma atado a las tradisyones, i tienen mas o menos los mezmos gustos. Sus pensadas politikas no los yevan a azersen miembros o aktivistas de algun partido. En Turkia tuvimos grandes rabinos, grandes poskim ke eskrivieron muncho, ma nunka tuvimos “ultra orthodoxes”. Ansi es entre los Turkanos de Israel : todos son Djudios buenos, konservatives, observantes mas poko ke muncho, muy pokos son los ke izyeron teshuva o se fueron detras de Habad!

La vida familial del Turkano en Israel no troka muncho del ke bive en Turkiya. Kontinuan los uzos, las komidas, el respekto de padre i madre (aunke si se uzava bezar la mano del padre o de la madre, agora no ay esto) el atadijo entre ermanos, el fiestar las fiestas en djuntos, las komidas i la forma de gizar, kontinuan a ser valores importantes ke no trokaron, mezmo si la segunda jenerasion izo kazamiento kon Ashkenazim. El inyeto i la inyeta son los ke embezan el Ebreo a los avuelos, komo entre todos los olim!

Muy pokos son los Turkanos ke entraron en prezion : no tenemos ladrones, o malazedores. A la kontra, tenemos djuzgos i avokatos, artistas, munchos doktores i profesores, dentistas, farmasistas, injeniores, diplomatos, spesialistos en agrikultura, grandes komersantes i industriales.

Kero avlar, tratando del profil de los Turkanos en Israel, de los sentimientos ke eyos tienen enverso la Turkiya, i de la importansa ke tienen para eyos las relasiones entre Israel i la Turkia.

Uvo, entre los imigrantes de los primos anyos del estado, ken arazgo el pasaporto kolorado Turko , i ke ayinda no tienen grande simpatia para sus payis natal. Sovretodo estos kavos tiempos. Ma ay muy pokos ke mantuvieron enimistad a la Turkiya. Jeneralmente, el Djudio de Turkiya mezmo despues de 60 anyos no se olvido el Turko, le plaze viajar a Turkiya mezmo si no le kedo famiya ayi, le gusta la muzika Turka, las komidas Turkas, i un tiempo no mankava de sigyir los filmos Turkos del dia de viernes en la Televizyon. Oy tenemos en Israel dos estasiones de TV Turkas , munchos ke tienen en el techo o balkon (tchanak – o tsalahat) para resivir todas las emisyones de Turkiya. Esta karakteristika del Turkano en Israel, el fakto ke el prefera amigos ke son de Turkiya, avla kon eyos en Turko, no tienen un deputado en la Knesset es kritikada en Turkiya, kon la interpretasion yerrada komo si no mos integrimos al payis ! A estos ay ke akodrar Turkanos pagaron kon sus vida la defensia de Israel.

Los Turkanos en Israel estan muy araviados kon el governo Turko aktual, i su Primer Ministro, ke por sus tendensias Islamikas i ganar votos esta tanto kritikando a Israel, ke va kreando krizas diplomatikas. La prensa Turka de oy esta yena de artikolos kontra Israel, i se permeten tantas manifestasiones kontra Israel ke enkorajan el antisemitizmo. En su kualidad rekonosida por ser el reprezentante de los Turkanos de Israel , i segun la tendensia de la mayoria de los Turkanos, prezento la Itahdut letras de protesto a la Embasada Turka , a los mas altos dirijentes del Governo Turko, sovre lo ke se pasa en Turkiya , la enimistad i los insultos en las kayes i en la prensa kontra los Djudios de ayi i Israel. No puedo dizir ke esto izo muncho efeto, ma no estuvimos kayados i ise izo lo ke el Djudio ke bive oy en Turkiya no puede azer.

Voluntarios Turkanos se okupan de la hasbara en lingua Turka para neutralizar –en partida- las mentiras i la disinformasion en la prensa Turka. El Djudio de Turkiya en Turkiya esta keshozo –kon razon- ke Israel no aze bastante en este payis para desmentir las akuzasiones kontra Israel i los Djudios en la prensa Turka. Lo ke akodra el proberbo Turko (el silensio es akseptar la kulpa! O “sukut ikrardandir!” ). Ma la enimistad kontra Israel i los Djudios esta muy grande para poder luchar kon eya.

Se puede dizir ke la kualidad de “unseen” esta –en partida- empesando a trokar, el orgolio de ser Israeli i no estar kayados enfrente la injustisia de las akuzasiones en la prensa i en boka de los dirijentes Turkos aze ke la Itahdut eksprima enerjikamente su deskontentes a los dirijentes Turkos.

Djuntos kon esto, estando muy konsientes de la importansa de las relasiones entre Israel i Turkiya, i en konformidad kon la politika del governo de Israel, la Itahdut mira siempre a ayudar a adelantar estas relasiones, en resiviendo i eksplikando a personalidades Turkas ke vienen avijitar las realidades de Israel. Kon este motivo es ke la Itahdut mantiene las mijores relasiones kon la Embasada Turka. Esta aktividad resivio apresiasion de parte del governo Turko, la prova es ke la Itahdut resivio en 2005 una medalia i sertifikado del Ministro Turko del Estranjero. El Ministerio del Ekterior Israeli tambien apresia los esfuersos ke azen los Turkanos de Israel. Jeneralmente el reprezentante Turko ke vijita Israel esta enkantado de ver komo el Turkano konservo muncho de la Turkiya, su lingua, sus uzos, sus gustos, i esto lo apresyan muncho.

El buto principal de la Itahdut – ke reprezenta a los Turkanos de Israel -era i ayinda es el ayudo al Ole : Turkanos voluntarios se okupan i les trayen un ayudo importante –puede ser no bastante- para la integrasion, kon ayudo moral i material a los olim ke vienen. La komisyon de la Aliya de la Itahdut, los resive, los akompania i mira de solusionar sus problemas de integrasion, de vivienda, de menesteres medikales i edukativos, de eksplikarles las realidades del payis, i de toparles echo. Este lavoro de voluntarios i donasiones de los Turkanos mezmos son muy importantes, mezmo si no solusionan todo problema..

La Itahdut kolavora kon la Autoridad Nasionala del Ladino ke reprezenta maestro patrimonio Kultural basho la direksion del Prezidente Itshak Navon. El Turkano es el elemento el mas konservativo del Ladino. El Sentro de Ladino de Bar Ilan es fundado por el Turkano Sr. Selim i su espoza Sra Naime Salti. El Sentro Moshe David Gaon es tanbien kreado por la famila Gaon kon rayizes Turkanas. En el lokal de la Itahdut en BatYam tienen lugar las reuniones del (Salon del Ladino). Los ke dirijeron las emisyones en ladino en la Kol Israel fueron i son siempre Turkanos, por nombrar a Yitzhak Levy zl, Moshe Shaul, Alegra Amado, Kamelia Shahar zl., i Zelda Ovadia. Los kantadores de kantes en ladino Kobi Zarko, Yasmin Levy, Moshe Kohen (Moshico), Yosi Geron, Moti Adanali son Turkanos. Komo lo ke le arivo al Yiddish, la segunda jenerasion de olim de Turkiya no tiene al Ladino komo lingua maternal. En Turkiya el ladino esta kuaje abandonado, ma ayi tanbien se azen grandes esfuersos para konservar la kultura del Ladino, kon publikasiones i aktividad teatrala i Muzikala importante, i el Sentro de Investigasiones sovre la Kultura Sefaradi Otomano-Turka, enkavesada por Karen Gerson Sarhon.

Los Turkanos de Israel meldan el (Bulten), jurnal bi-mensual kon artikolos i novedades de lo ke se pasa entre mozotros en Israel. Esto se publika en Turko, kon pajinas en Ladino i en Ebreo, i es ditribuido sin paga a los Turkanos, mezmo si no son miembros de la Itahdut. . Ekziste un sitio Internet (www.Turkisrael.org) muy riko en informasiones i link’es sovre el Djudaismo en varias linguas, kon el esprito de dar a konoser a Israel, i a los Turkanos de Israel.

Las stipendias ( o bekas) son kon buto de aserkar a los estudiantes de famiyas Turkanas a sus raizes Sefaradiyas i Turkanas, i los fondos vienen de la kontribusion de Turkanos de Israel i del mundo. Kada anio kuaje 50 jovenes universitarios de famiyas de Turkanos resiven las stipendias. En su lokal de Bat Yam la Itahdut aze todas sus reuniones, konferensias, distribusion de las stipendias, resive jurnalistas, diplomates de Turkiya , tiene sus buros kon su sekretario General.

Ma no podemos dizir ke todos los Turkanos de Israel azen la kola para inskrivirsen komo miembros a la Itahdut, pagar sus kotizasyones, Inskrivirsen para ayudos komo voluntarios! Malorozamente no tanto. Los revinidos de la Itahdut vienen por la majoria de donasiones, el ayudo de la sohnut es minimal o no ekziste.

Aparte de la Itahdut, ekziste un grupo ke se yama Arkadas, donde el lokal es en Yehud, i ke se konsentra mas en fiestas, selebrasiones, i tures en Israel. Otro grupo (Dostluk) en Bat Yam se okupa de mezmas kozas, i esta reprezentado en el Konsilio (la Moatsa) de la Itahdut, djuntos kon grupos de Natania, de Petah Tikva, i de Yehud.

Las Lodjas de Bnei Brit i de los Masones Turkanos ke se fondaron i emplean la lingua Turka o el Ebreo son muy reushidas, arekojen a diezenas de Turkanos para lavoros intelektuales i edukativos, i gozan de una fama muy pozitiva entre las otras lodjas de Israel en dando mijor a konoser ken es el Turkano de Israel, por su asiduita i seriozidad.

Desde siempre la Itahdut esta en kontakto kon el Gran Rabinato i la Komunidad Djudia de Turkiya,ke en siertas okaziones tienen kontaktos importantes. Kuaje kada anyo grupos teatrales de los Djudios de Turkia dan reprezentasiones en Israel i los Turkanos inchen Iel salon i dan palmas a los amigos de Turkiya.

En Israel se fondo, 10 anyos antes un grupo de korespondensia en Internet en linguaTurka, para Djudios de Turkiya en el mundo entero, se yama oy Mozotros, i es el solo foro onde kada uno se puede eksplikar libremente i komunikar. La mitad de los kuaje 800 miembros son en Israel , i la otra mitad en Turkiya i el mundo. Las kritikas ke se azen en este foro influensan muncho –mezmo si no se admite- para mejorar las funksiones de la Itahdut i de la komunidad de Turkiya. Konosensias i enkuentros entre los miembros krearon amistades virtuales, kollaborasiones kulturalas. Donde el ultimo fue la publikasion de la antolojia de Yunus Emre, poeta-filozofo Turko del 13′en siglo al Ebreo, por la primera ves.

Aze pokos mezes un grupo de Djudios Turkanos krearon un grupo internet ke kontenera material explikativo (hasbarati) en Turko (Hasturk) en favor de Israel. Muncho de lo ke aze este grupo ariva a miles de djente por Jurnales Turkos en la Internet o diferentes grupos.

Komo en Turkiya, a los Turkanos les plaze arekojersen en las kazas, para munchos el embeleko importante son las kartas, (el fikso), los jovenes son egzaktamente komo la mayoria de los Israelis, intereso no muncho en la politika, muncho en aktividades kulturales i viajes en el mundo, sport, i naturalmente pagar la mashkanta de la kaza!

En kurto puedo konkluir i dizir ke el profil del Djudio de Turkiya en Israel es bastante diferente de otros grupos de olim, i es karakterizado por lo sigyente :

Todos ?zyeron aliya sin ser aronjados, i muy pokos son los ke no tienen simpatia por la Turkiya entre las tres jeneras?ones de Turkanos desde la fundas?on del Estado de Israel.

En desparte de lo ke no se mesklaron a la politika – por razones tradisyonalas- todos son patriotas Israelis, todos sierven la armada, pagan dasios i no kavzan problemas a la sosiedad Israeliana. Sus karakteristika de (Unseen= invisibles) ekziste i parese ke va kontinuar en grande parte, prinsipalmente porke no tienen pretensiones politikas.

La kontribusion del Turkano al establisimiento, al developamiento, a la vida akademika, a la medisina, a la agrikultura, a la armada i a la diplomasia de Israel no puede ser neglijada.

El Turkano de Israel kontinua a ser un ponte entre Israel i la Turkiya, lo ke es enteramente el intereso de Israel i de los pokos Djudios ke kedaron en Turkiya. Este kontakto i las aktividades kulturales tienen el eskopo de renforsar sus identifikasion kon el Estado de Israel.

Es ke la segunda i la tresera jenerasion de Turkanos, kon kazamientos por majoria kon judios-judias non Turkanos, van a permeter de kontinuar este profil? Ke podra ser el futuro de la Itahdut? Esta kestion a mi avizo esta en dubio.

Rogaremos ke se adjunten (kon sus propria desizyon) munchos mas de los Djudios de Turkiya a los Turkanos de Israel, i ke la paz i el sukseso de Israel seyga el motivo de sus Aliya.

 

Fuente: LadinoKomunita