|
Uzos i kustumbres de los Sefaradis en Turkia
Banyo de la novia
La seremonia ke segia el dia del ashugar era el dia del banyo de la
novia. Por falta de mikve, del banyo ritual, en akeya epoka las
novias se ivan al hamam, o sea al banyo turko. Asta 70-80 anyos
atras el dia del banyo de la novia era un evenimiento muy espesial.
Se aprontava una chanta kon las tevajas brodadas, shavones i
perfumes i otros menesteres mas i se tomava el kamino al banyo, ke
jeneralmente no eran serka de kaza. Estamos avlando de una epoka en
la kuala el transporto publiko no eran tan komodo sin avlar de otos
privados ke era el privilejio de los rikos solamente. No se kere dicho ke este evenimiento tan alegre i en mizmo tiempo importante, del punto de vista de la alaha, era un dia eksklusivamente de mujeres. Las mujeres de la famiya, madre, esfuegra, ermanas, kunyadas, amigas i una o dos vizimas de las mas intimas eran envitadas al banyo ke kon kantes i bayles lavavan a la novia. En los siglos 18, 19 i mizmo a los prinsipios del siglo 20 traian al banyo chalgi. Esta era una mini orkestra kompuesta, naturalmente solamente de mujeres ke tokavan el ud, el kemenche, el kanun i el pandero.
Es klaro ke el chalgi i todo lo bueno ke se traia para komer despues
ke la novia ya salia afuera bien lavada i enshavonada, i emburujada
kon las tevajas goliendo al almiskle, tenia lugar en la grande sala
del banyo turko o kon las palavras de muestros dias en el “lobby”
del banyo. La komida era una parte integrala de este dia.
En el pasado de mizmo ke oy la seremonia nupsial tenia lugar en el
kal. Djente ke tenian kazas grandes preferavan de azer el kazamiento
en sus kaza. A la salida de la boda se dava a kada uno de los
envitados una chika bonboniera kon drajes, o ke los bonbobes se
metian alientro de papel selofan ke se atavan kon una kordelika. Dos las kustumbres ke ya no existen mas son el Shabat de beza mano i el Shabat de tornaboda. El shabat de beza mano era el Shabat de antes de la boda. En este dia el novio i sus djenitores vinian a la kaza de la novia para darle el bezamanos, el regalo de boda ke era siempre una djovya. El Shabat de despues de la boda era i lo es asta oy el Shabat hatan. Unos kuantas semanas despues de la boda, el padre i la madre de la novia envitavan al novio, a sea a sus yerno, de manera ofisiala a sus kaza i aprontavan en su onor un buen pranso. La rezin kazada vinia pokos dias antes del kombite a la kaza de su padre i madre para resivir a su marido. Este era el Shabat de tornaboda.
|
